Ձախ մի՛ գնա, աջ մի՛ գնա. Դավիթ Հարությունյանը` Freedom house-ի զեկույցի մասին

e05ddf4ea77b027b4b0e18930b735659

Կառավարության նիստից հետո լրագրողների հետ ճեպազրույցում արդարադատության նախարար Դավիթ Հարությունյանն անդրադարձավ առաջին դռնփակ նիստին: Լրագրողները նշեցին, որ գործադիրի անդամները էական տարբերություն չեն նկատել բաց և դռնփակ նիստերի միջև, այդ դեպքում՝ ինչո՞ւ որոշվեց դռնփակ նիստեր անցկացնել:

Նախարարը չհամաձայնեց, որ փոփոխություն չկա` ասելով, որ եթե նախկինում նիստերը մոտ կես ժամ էին տևում, ապա այսօր դռնփակ նիստը մոտ մեկուկես ժամ է տևել: Բացի այդ` դռնփակ նիստում հնչել են բազմաթիվ բովանդակային հարցադրումներ, ինչը նախկինում չէր լինում:

Լրագրողների հարցին` ինչպես կմեկնաբանի Freedom house կազմակերպության զեկույցում ներառված այն գնահատականը, թե Հայաստանը ավտորիտար ուղու վրա է, Դավիթ Հարությունյանը պատասխանեց, որ Freedom house-ը, իհարկե, հեղինակավոր կազմակերպություն է, սակայն նրա ոչ բոլոր զեկույցներն են բացարձակ օբյեկտիվ:

«Ես առաջին անգամ եմ տեսնում Freedom house-ի զեկույց, որն արմատապես տարբերվում է նախորդ զեկույցների բովանդակության մեթոդաբանությունից: Եթե որևէ մեկն ուշադիր կարդա այս զեկույցը, ապա, կարծում եմ, զարմանքով կհայտնաբերի իրար հակասող դրույթներ: Օրինակ` եթե Սերժ Սարգսյանն առաջադրվում է` որպես վարչապետ, ապա, ըստ զեկույցի, դա երկիրը կտանի դեպի ավտորիտար ռեժիմ, եթե Սերժ Սարգսյանը չառաջադրվի` որպես վարչապետ, ապա դա կդառնա գործադիրի լռելյայն կառավարում: Այսինքն` ձախ մի գնա, աջ մի գնա»,- ասաց նախարարը:

Մեկ այլ օրինակ բերեց նախարարը զեկույցից. խոսվում է «Սասնա Ծռեր» խմբավորման մասին, սակայն ոչ մի խոսք չի ասվում, որ այդ խմբավորումը իրականացրել է զինված հարձակում պետական մարմնի վրա:

«Ցավով եմ նշում` սա Freedom house-ի առաջին զեկույցն է, որն արմատապես շեղվել է դասական մեթոդաբանությունից: Ես երբեք չեմ տեսել զեկույցներ, որում քաղաքական գործիչներին որոշակի պիտակավորում են փակցնում: Սա այն զեկույցն էր, որում մարդկանց պիտակավորում էր արվում: Դա արժեզրկում է զեկույցը»,- ասաց Հարությունյանը:

 

Ձեզ կարող է դուր գալ նաև

Մեկնաբանել

Ваш e-mail не будет опубликован. Обязательные поля помечены *