Ո՞վ կլինի ՀՀ հաջորդ նախագահը

timthumb (13)

Դեռ երկու տարի առաջ հենց այս հարցն էր օրակարգային քաղաքական ուժերի համար, որովհետեւ նախագահական ընտրություններն ու նախագահի ինստիտուտն էին որոշում երկրի իշխանության հարցը։ Բաղրամյան 26-ն իր այսօրվա ազդեցիկությունը կպահպանի մինչեւ 2018թ.-ի ապրիլը, երբ Սերժ Սարգսյանի պաշտոնավարման ավարտը կնշանավորվի նաեւ նախագահի ինստիտուտի իրավա-քաղաքական կարգավիճակի փոփոխությամբ։ Նոր կառավարման համակարգն իշխանության կենտրոն դարձնում է կառավարությանը՝ վարչապետի գլխավորությամբ, իսկ նախագահին վերապահվում են ներկայացուցչական, արտաքին քաղաքականության արարողակարգային լիազորություններ։ Բայց, ինչքան էլ «խուզված» լինեն նոր նախագահի լիազորությունները, այդ պաշտոնյան սահմանադրորեն հանդիսանալու է պետության գլուխը, ունենալու է որոշակի ազդեցիկություն, մեծ կամ փոքր «բաժնեմաս»՝ իշխանության համակարգում։ Այսինքն, չորրորդ նախագահը՝ նույնիսկ անկախ անձից, ինտեգրված է լինելու իշխանության էլիտային, մանավանդ՝ այս պաշտոնյայի ընտրությունը կախված է խորհրդարանական մեծամասնությունից, իդեալական տարբերակում (եթե ընտրվի առաջին փորձից)՝ նաեւ ընդդիմության կամ դրա մի հատվածի աջակցությունից։ Ասել կուզի՝ նախագահն ինչ-որ իմաստով խորհրդանշելու է քաղաքական մեծ ու փոքր համաձայնություններ՝ կամա թե ակամա ստանձնելով «քաղաքական արբիտրի» դեր։
2018-ից Հայաստանի Հանրապետությունն այլեւս խորհրդարանական կառավարմամբ երկիր է լինելու, իսկ նախագահը, ըստ 2015-ին փոփոխված Սահմանադրության, շարունակելով լինել պետության գլուխը, այլեւս չի լինելու ժողովրդի քվեարկությամբ ընտրված պաշտոնյա, այլ ընտրվելու է ԱԺ-ի կողմից: Թե ով է լինելու այդ նախագահը՝ դեռ վաղ է ասել, սակայն, չգիտես ինչու, թե՛ քաղաքական, թե՛ հասարակական սեկտորում Սերժ Սարգսյանի թեկնածությունը չի դիտարկվում որպես այդ պաշտոնի հավակնորդ: Բայց՝ իզուր: Ինչ վերաբերում է Սահմանադրության այն պահանջին, որ նախագահը չի կարող լիազորություններն իրացնելիս լինել կուսակցության անդամ, ապա Սարգսյանի՝ ՀՀԿ-ից դուրս գալը ոչ մի բան չի փոխի այդ կուսակցությունում: Այն ինչպես ծառայել, այնպես էլ շարունակելու է ծառայել Սարգսյանին այնքան ժամանակ, քանի դեռ նա այդ ուժը դիտարկում է որպես գործիք՝ իշխանության մեջ մնալու համար:
Մամուլում քննարկվում է 2018-ին ՍԴ նախագահ Գագիկ Հարությունյանին ՀՀ նախագահ դարձնելու տարբերակը: Վերջինս 2004 և 2008թ.թ. Ռոբերտ Քոչարյանի ու Սերժ Սարգսյանի իշխանությունների համար անուրանալի ծառայություն է մատուցել: Բացի այդ, «Հայաստան» հիմնադրամում նա մեծ ավանդ ունի: Սփյուռքի գրեթե բոլոր շրջանակներում համարվում է չվարկաբեկված կամ քիչ վարկաբեկված հայաստանցի պաշտոնյա: Հետևաբար, հաջորդ տարի, երբ լրանում է Գագիկ Հարությունյանի 70-ամյակը, և նա պետք է թողնի Սահմանադրական դատարանի նախագահի պաշտոնը, Սերժ Սարգսյանը կարող է նրան ՀՀ նախագահի պաշտոնը «հանձնել»։ Կարծես՝ Գագիկ Հարությունյանը միակ անձն է, որին ԱԺ-ն առանց որևէ խնդրի կընտրի այդ պաշտոնում:
Քննարկվում է նաև ԼՂՀ նախկին նախագահ Արկադի Ղուկասյանի թեկնածությունը։ Նրա անունը պարբերաբար շրջանառվում է տարբեր պաշտոնների առնչությամբ, քանի որ Սերժ Սարգսյանի ու նրա ջերմ հարաբերությունների մասին բոլորը գիտեն։ Այս պարագայում կարող է խանգարել միայն ղարաբաղցի լինելու հանգամանքը: Եվ վերջապես՝ չորրորդ նախագահ կարող է դառնալ մեկը, ով իշխանություններին անգնահատելի ծառայություն կմատուցի խորհրդարանական առաջիկա ընտրություններում։ Մոտավորապես այն եղանակով, ինչի շնորհիվ ժամանակին Արթուր Բաղդասարյանը հայտնվեց ԱԽ քարտուղարի պաշտոնում։
Ստելլա Խաչատրյան

 

Ձեզ կարող է դուր գալ նաև

Մեկնաբանել

Ваш e-mail не будет опубликован. Обязательные поля помечены *