«Հայազն» կուսակցությունը միանում է «Միասնություն» համազգային շարժմանը

«Հայազն» կուսակցության առաջիկա անելիքների, Հայաստանի ներքաղաքական կյանքի զարգացումների և կուսակցության՝ «Միասնություն» համազգային շարժմանը միանալու շուրջ, past.am-ը զրուցել է «Հայազն» կուսակցության վարչության անդամ Արմեն Մկրտչյանի հետ.

-Պարոն Մկրտչյա՛ն, «Հայազն» կուսակցությունը, խորհրդարանում ներկայացված չլինելով հանդերձ՝ ակտիվորեն մասնակից է դառնում քաղաքական պրոցեսներին՝ տարատեսակ ակցիաների, ցույցերի միջոցով: Դուք հատկապես ակտիվորեն մասնակցություն ունեցաք «Էլեկտրիկ Երևան», «Սասնա Ծռեր» շարժումների ժամանակ, արդյոք չե՞ք պատրաստվում մեծ քայլով առաջ գնալ և մտնել պայքարի մեջ՝ ավելի հստակ քայլերով:

Բնականաբար, ինչպես ցանկացած կուսակցություն, «Հայազն»-ը ևս ստեղծվել է ընտրական պրոցեսների մասնակցելու նպատակով: Ստեղծման և գործունեության 3 տարիների ընթացքում «Հայազն»-ում կար ընտրությունների մասնակցության ձևաչափի մի տարբերակ, որը վերջին ամիսներին երկարատև քննարկումների արդյունքում մերժվեց, և մեր կուսակցական ընկերներից որոշները, ովքեր այդ ծրագրի ստեղծողներն էին, այսօր այլևս կուսակցությունում չեն: Կուզեի նշել, որ մենք իրոք շնորհակալ ենք այդ մի քանի ընկերներին՝ այս տարիների համագործակցության համար: Ճի՛շտ եք, կուսակցությունը հաճախ է եղել քաղաքացիական շարժումների կիզակետում, սակայն կա մի պարզ ճշմարտություն. բոլոր սոցիալական խնդիրները, որոնց դեմ մենք պայքարել ենք ու պայքարելու ենք, ունեն քաղաքական դրդապատճառներ: Ցավոք, ապրիլյան քառօրյա պատերազմը, «Սասնա Ծռեր»-ի հայտնի գործողությունը՝ իշխանությանն այդպես էլ ուշքի չբերեցին: Ամենաթողությունը վերջ չունեցավ, իսկ օդում կախված խնդիրները մինչ օրս էլ ունեցան միայն կոսմետիկ լուծումներ: Այդ առումով՝ 2017թ. ԱԺ ընտրությունները բավական ձեռնատու իրավիճակ է ստեղծում նոր որակի քաղաքական ուժերի համար: Մենք մեր ուժերի ներածի չափով նպաստելու ենք հնարավոր ընդդիմադիր կոնսոլիդացիաներին, և ինքներս էլ հանդես ենք գալու ընտրություններին՝ մասնակցության կոնկրետ ձևաչափով:

— Ձեր քաղաքական թիմը, բաղկացած լինելով հատկապես երիտասարդներից, ովքեր երբևէ քաղաքական տարբեր առուծախերի մեջ չեն սպառել իրենց, կարող են նոր և ավելի ազդեցիկ խոսք ասել հայաստանյան քաղաքական անցուդարձում, ինչպե՞ս եք պատրաստվում դա իրագործել:

Այսօր բոլորը խոսում են սերնդափոխության անհրաժեշտությունից. անգամ ՀՀԿ-ում են խոսում այդ մասին: Իհարկե, արդարացված պահանջ է, սակայն եթե փորձենք հասկանալ, թե ով ինչ է ընկալում սերնդափոխության տակ, կստացվի շիլա-փլավ: Հստակեցնելու համար ասեմ, որ մեր ձգտած սերնդափոխությունը բնավ կապ չունի «հարվարդյան երիտասարդներին» բերելու հետ: Ոչ էլ խնամի-ծանոթ-փեսա-բարեկամ կապերով իշխանության գալն ի նկատի ունենք: Կա հարթակի խնդիր, որտեղ մեր սերունդը կկարողանա ըստ արժանվույն դրսևորվել, և ցույց տալ իր ուժը: Այսօր մենք  գտել ենք այն հարթակը, որտեղ լավագույնս կարող ենք ինքնարտահայտվել և մեր խոսքն ասել Հայաստանում ծավալվող քաղաքական կյանքում:

-Ըստ մամուլի բազմաթիվ հրապարակումների՝ Արման Վարդանյանի նախաձեռնությամբ սկիզբ դրվեց «Միասնություն» համազգային շարժմանը: Բազմաթիվ հանդիպումների ու քննարկումների արդյունքում «Հայազն»-ը  որոշում կայացրեց միանալ այդ շարժմանը, ո՞րն է Ձեր հաջորդ քայլը, ինչպիսի՞ն է Ձեր տեսլականը, որը նպատակադրվել եք իրականացնել:

Այո՛, իմ կողմից շատ հարգված մարդիկ, ովքեր նախաձեռնել են «Միասնություն» համազգային շարժումը, մեզ ևս առաջարկել են դառնալ շարժման միավոր: Երկար քննարկումների, գաղափարական ու տեխնիկական համաձայնեցումների արդյունքում՝ մեր կողմից առաջարկն ընդունվեց: Պլատֆորմը, որի վրա ձևավորվում է շարժումը, վերկուսակցական է, փորձում է դառնալ սերնդափոխության, առողջ գաղափարների և հաղթանակի ձևաչափ, ինչի հանդեպ կասկած չունեմ: Սովորաբար՝ նախընտրական դաշինքներն ու պլատֆորմները լինում են մեկ-երկու անձի շուրջ ձևավորված ու անձնական շահագրգռումներով: Այստեղ երկու խնդիրներն էլ բացառված են, որովհետև շարժումը կոչված է հենց լիդեր տեսակներին միավորելու՝ հանուն պետական և համազգային շահերի: Ես ամեն օր տեսնում եմ, թե շարժման շուրջ որքան ազնիվ ու պայքարող տեսակներ են հավաքվում:

Ես տեսնում եմ թիմի ամենօրյա քրտնաջան աշխատանքը, և դա ինձ մեծ վստահություն ու էներգիա է տալիս: Հայաստանում դեռևս նման ձևաչափի շարժում չի ձևավորվել և ես վստահ եմ՝ «Միասնություն» համազգային շարժումը տոնելու է իր հաղթարշավը:

 

Ձեզ կարող է դուր գալ նաև

Մեկնաբանել

Ваш e-mail не будет опубликован. Обязательные поля помечены *